कञ्चनपुर ।हिजो सडकमा उभिएर जनताको दुःख–सुखमा साथ दिँदै आएका दीपक बोहरा आज त्यही जनताको आवाज संसदसम्म पुर्याउने दृढ संकल्पका साथ प्रतिनिधिसभा निर्वाचनमा होमिएका छन्। कञ्चनपुर निर्वाचन क्षेत्र नम्बर २ बाट उम्मेदवार बनेका बोहराले इमानदार नेतृत्व, कर्मशील राजनीति र जनमुखी सोचलाई आफ्नो मुख्य आधार बनाउँदै चुनावी अभियान तीव्र पारेका छन्।
लामो समयदेखि सामाजिक सेवा, जनचासोका विषय र स्थानीय समस्या समाधानमा सक्रिय रहँदै आएका बोहरा जनतामाझ ‘काम गरेर देखाउने नेता’का रूपमा चिनिँदै आएका छन्। सडक, शिक्षा, स्वास्थ्य, रोजगारी र सुशासनजस्ता विषयमा निरन्तर आवाज उठाउँदै आएका उनले अब ती मुद्दालाई नीति निर्माणको तहसम्म पुर्याउने लक्ष्य लिएको बताएका छन्।
चुनावी सभाहरूमा बोहराले विगतका राजनीतिक अभ्यासप्रति असन्तुष्टि जनाउँदै अब देश र जनताको वास्तविक आवश्यकता बुझ्ने नेतृत्व आवश्यक भएको उल्लेख गर्दै आएका छन्। “सत्ता होइन, सेवा नै मेरो राजनीति हो,” भन्दै उनले जनतासँग प्रत्यक्ष संवादमार्फत विश्वास जित्ने प्रयास गरिरहेका छन्।
स्थानीयवासीहरूका अनुसार बोहरा कुनै औपचारिक पदमा नरहे पनि समस्याका बेला सधैं अग्रपंक्तिमा देखिने नेता हुन्। यही कारण कञ्चनपुर–२ का मतदातामाझ उनको समर्थन क्रमशः बढ्दै गएको देखिन्छ।
आफ्नो चुनाव चिह्न घण्टी 🔔 रहेको स्मरण गराउँदै बोहराले परिवर्तन, इमानदारी र जवाफदेहिताका लागि यसपटक घण्टीमा मतदान गर्न मतदातालाई आग्रह गरेका छन्। “सडकबाट सुरु भएको हाम्रो यात्रा सदनसम्म पुर्याउन तपाईंहरूको एक मत नै निर्णायक हुनेछ,” उनको भनाइ छ।
कञ्चनपुर–२ मा यसपटकको निर्वाचनलाई परिवर्तनको अवसरका रूपमा हेरिएको छ। जनताको विश्वास जित्न सफल भए दीपक बोहरा नयाँ राजनीतिक संस्कृतिको उदाहरण बन्न सक्ने अपेक्षा स्थानीय तहमा गरिएको छ।
