भुटानको ऐतिहासिक १०८ बौद्ध स्तूप निर्माण अभियानमा विनोद चौधरीको सहभागिता, चौधरी ग्रुपको योगदान
द टन न्युज | विशेष रिपोर्ट
काठमाडौं । नेपाली कांग्रेसका उपसभापति तथा उद्योगपति विनोदकुमार चौधरीले भुटानको गेलेफु माइन्डफुलनेस सिटीमा आयोजित ऐतिहासिक १०८ बौद्ध स्तूप निर्माण अभियानमा सहभागी हुन पाउँदा आफूलाई गौरवान्वित र भावुक महसुस भएको बताएका छन्।
भुटानको राजपरिवारको विशेष निमन्त्रणामा आफू उक्त ऐतिहासिक कार्यक्रममा सहभागी भएको उल्लेख गर्दै चौधरीले यस अभियानलाई आस्था, श्रद्धा, सामुदायिक एकता र आध्यात्मिक सद्भावको अनुपम उदाहरणका रूपमा चित्रण गरेका छन्।
भुटानका राजा महामहिमको परिकल्पनामा अघि बढाइएको १०८ बौद्ध स्तूप निर्माण पहलले हजारौँ मानिसलाई एउटै आध्यात्मिक उद्देश्यमा जोडेको चौधरीले आफ्नो सामाजिक सञ्जालमार्फत उल्लेख गरेका छन्।
यस अर्थपूर्ण अभियानमा चौधरी ग्रुपले समेत योगदान गर्न पाएकोमा उनले खुसी व्यक्त गरेका छन्। बौद्ध सम्पदाको संरक्षण, शान्ति, करुणा र सद्भावको सन्देश प्रवाह गर्ने यस अभियानले समाजमा सकारात्मक एकताको भावना विकास गर्ने विश्वास उनको छ।
नेपाल र भुटानबीच ऐतिहासिक, सांस्कृतिक तथा आध्यात्मिक सम्बन्ध रहँदै आएको छ। दुवै देशको साझा बौद्ध परम्परा र सभ्यताले जनस्तरको सम्बन्धलाई समेत नजिक बनाउँदै आएको सन्दर्भमा यस्तो अभियानमा सहभागी हुन पाउनु विशेष महत्त्वको विषय भएको चौधरीले बताएका छन्।
१०८ बौद्ध स्तूप निर्माण अभियान केवल धार्मिक संरचना निर्माणमा सीमित नभई आस्था, संस्कृति, आध्यात्मिकता र सामुदायिक एकताको साझा प्रतीकका रूपमा अघि आएको छ।
चौधरीको सहभागिता र चौधरी ग्रुपको योगदानले नेपाल–भुटानबीचको ऐतिहासिक सांस्कृतिक तथा आध्यात्मिक सम्बन्धलाई थप उजागर गरेको छ। दुई देशबीचको आपसी सद्भाव, सहकार्य र साझा सम्पदाको सम्मानलाई थप मजबुत बनाउने यस्ता पहलले क्षेत्रीय सम्बन्धमा समेत सकारात्मक सन्देश प्रवाह गर्ने अपेक्षा गर्न सकिन्छ।
द टन न्युज
Accuracy, Balance and Credibility
