काठमाडौं।कुनै समय “हिँड्न नसक्ने प्रधानमन्त्री” भनेर आलोचना र टिप्पणी खेपिरहेकी सुशिला कार्की आज दृढ इच्छाशक्ति, साहस र कर्तव्यनिष्ठाको प्रतीक बनिसकेकी छन्। देश जटिल राजनीतिक संक्रमणबाट गुज्रिरहेको बेला, सुशिला कार्कीले असम्भव जस्तो ठानिएको निर्वाचन प्रक्रिया अघि बढाएर सफलतापूर्वक सम्पन्न गर्ने तयारी गरेपछि उनलाई चौतर्फी प्रशंसा मिलिरहेको छ।
राजनीतिक उतार–चढावका बीच मन्त्रीहरूले राजीनामा दिएर बाहिरिँदा समेत उनले जिम्मेवारीबाट पछि नहट्दै सबै मन्त्रालयको कामकारबाही सम्हालेको बताइन्छ। सीमित शारीरिक अवस्थाका बाबजुद राज्य सञ्चालनमा देखाएको सक्रियता र निर्णय क्षमताले नेतृत्वप्रति नागरिक विश्वास अझ मजबुत भएको विश्लेषण भइरहेको छ।
विभिन्न सार्वजनिक कार्यक्रमहरूमा उपस्थिति जनाउँदै उनले राष्ट्रिय एकता, सामाजिक सद्भाव र सहकार्यको सन्देश दिएकी छन्। सबै जातजाति, धर्म र संस्कृतिप्रति सम्मान प्रकट गर्दै समावेशी राष्ट्र निर्माणको प्रतिबद्धता व्यक्त गरेपछि उनको छवि अझ सुदृढ बनेको समर्थकहरूले बताएका छन्।
देशव्यापी रूपमा चलेको जेनजी आन्दोलनका सकारात्मक–नकारात्मक बहसका बीच धेरैले अहिलेको परिस्थितिमा देशले “आमा समान नेतृत्व” पाएको प्रतिक्रिया दिइरहेका छन्। सामाजिक सञ्जालदेखि सार्वजनिक मञ्चसम्म “धेरै–धेरै धन्यवाद आमा सुशिला कार्की” भन्ने अभिव्यक्ति गुञ्जिरहेको छ।
राजनीतिक अस्थिरता र चुनौतीका बीच दृढता, संयम र प्रतिबद्धतासहित अघि बढेको नेतृत्वप्रति नागरिक तहबाट बढ्दो समर्थन देखिएको छ। आगामी दिनमा निर्वाचन सम्पन्न भएपछि मुलुकले स्थायित्व र विकासतर्फ नयाँ अध्याय सुरु गर्ने अपेक्षा गरिएको छ।
