🟥 ब्रेकिङ समाचार: महेश बस्नेत को आरोप: ‘प्रतिशोधपूर्ण गिरफ्तारीको षड्यन्त्र, आन्दोलन कमजोर पार्ने प्रयास’

काठमाडौं । नेकपा एमालेका नेता महेश बस्नेत ले आफूविरुद्ध पुनः गिरफ्तारीको षड्यन्त्र भइरहेको आरोप लगाएका छन्। उनले सामाजिक सञ्जालमार्फत आफ्नो धारणा सार्वजनिक गर्दै पार्टी अध्यक्ष केपी शर्मा ओली विरुद्ध भइरहेको “प्रतिशोधात्मक कदम” विरुद्ध उठेको आन्दोलनलाई कमजोर पार्ने प्रयास भइरहेको बताएका छन्।

बस्नेतका अनुसार तीन वर्षअघि नै एक “फेक व्यक्ति” प्रयोग गरेर आफूविरुद्ध झुट्टा जाहेरी दर्ता गराइएको थियो, जुन प्रहरी अनुसन्धानबाट फर्जी प्रमाणित भइसकेको दाबी उनले गरेका छन्। साथै, सोही विषयमा उच्च अदालत पाटन मा दायर रिटसमेत खारेज भइसकेको उनको भनाइ छ।

उनले हाल सोही विषयमा पुनः पूरक जाहेरी दर्ता गरी मुद्दा अदालतमा विचाराधीन रहेको उल्लेख गर्दै, फेरि तेस्रो पटक नक्कली जाहेरी दिन लगाएर आफूलाई पक्राउ गर्ने योजना बनाइएको आरोप लगाएका छन्। साथै, यसका लागि “मिडिया ट्रायल” भइरहेको समेत उनको दाबी छ।

बस्नेतले वर्तमान सरकारप्रति कडा टिप्पणी गर्दै बालेन शाह नेतृत्वको सरकार र गृहमन्त्री सुदन गुरुङ लाई लक्षित गर्दै “निरंकुश र अधिनायकवादी शैली” अपनाएको आरोप लगाएका छन्।

त्यसैगरी, आफू फरार रहेको वा फोन अफ भएको भन्ने प्रचारलाई उनले पूर्ण रूपमा असत्य र भ्रामक भएको बताएका छन्। “जनमत भ्रमित गर्ने नियोजित प्रयास भइरहेको छ,” उनले भनेका छन्।

अन्त्यमा उनले यस्ता कार्यहरूको परिणाम सम्बन्धित पक्षले भोग्नुपर्ने चेतावनीसमेत दिएका छन्।