संखुवासभा — जब अधिकांशले ‘असंभव’ भन्छन्, त्यहीँबाट ‘सम्भव’ को यात्रा सुरु गर्ने व्यक्तित्व हुन् मिङमा शेर्पा। संसारका ८ हजार मिटरभन्दा अग्ला १४ वटै हिमाल सफलतापूर्वक आरोहण गरेर गिनिज वर्ल्ड रेकर्डमा नाम लेखाउने पहिलो दक्षिण एसियालीका रूपमा परिचित उनी अहिले राजनीतिको नयाँ उचाइ चुम्ने तयारीमा छन्।
पर्वतारोहणको कठिन ‘डेथ जोन’ पार गर्दै विश्वमञ्चमा नेपालको झण्डा फहराएका शेर्पा अब संखुवासभाको विकासलाई ‘समिट’ पुर्याउने लक्ष्यसहित गाउँ–गाउँमा पुगेका छन्।
अठोट र अनुशासनको पृष्ठभूमि
हिमालको काखमा हुर्किएका मिङमाले साहसलाई केवल रहरमा सीमित राखेनन्। अनुशासन, धैर्यता र टिमवर्कका आधारमा उनले विश्वका अग्ला हिमालहरू आरोहण गरे। चुनौतीका बीच नआत्तिने स्वभाव र स्पष्ट लक्ष्य निर्धारण गर्ने क्षमता अहिले उनको राजनीतिक पहिचान बन्दै गएको छ।
सफल उद्यमीबाट ‘जब क्रिएटर’
राजनीतिमा आउनुअघि नै आफूलाई स्थापित गरिसकेका शेर्पा नेपालको पर्यटन क्षेत्रमा अग्रणी कम्पनी Seven Summit Treks का नेतृत्वकर्ता हुन्।
उनको कम्पनीमार्फत हजारौँ गाइड, भरिया र पर्यटनकर्मीले रोजगारी पाएका छन्। वैदेशिक रोजगारीको विकल्प खोजिरहेका युवाका लागि स्वदेशमै अवसर सिर्जना गर्नु उनको व्यावसायिक पहिचान बनेको छ।स्थानीयहरू भन्छन्, “उहाँ रोजगारी खोज्ने होइन, रोजगारी सिर्जना गर्ने व्यक्ति हुनुहुन्छ।”
पर्यटनमार्फत समृद्धिको खाका
संखुवासभा प्राकृतिक सम्पदाले भरिपूर्ण जिल्ला हो। मकालु हिमाल र अरुण उपत्यका को काखमा रहेको यो क्षेत्रलाई विश्वस्तरीय पर्यटकीय गन्तव्य बनाउने स्पष्ट योजना शेर्पासँग छ।उनका अनुसार पर्यटन केवल विदेशी आगमनमा सीमित हुनु हुँदैन; यसलाई स्थानीय उत्पादन, संस्कृति र उद्यमसँग जोडेर आर्थिक क्रान्ति ल्याउनुपर्छ।
रास्वपाबाट राजनीतिक यात्रा
पर्वतारोहणपछि अब उनी राष्ट्रिय स्वतन्त्र पार्टी मार्फत राजनीतिक अभियानमा छन्। पुराना दलप्रति बढ्दो असन्तुष्टिका बीच शेर्पा ‘फ्रेस’ र परिणाममुखी विकल्पका रूपमा प्रस्तुत भइरहेका छन्।
उनले चुनावी अभियानका क्रममा भनेका छन् “जसरी हिमाल चढ्दा टिमलाई नेतृत्व गरेर शिखर पुर्याउँछु, त्यसरी नै संखुवासभालाई समृद्धिको शिखरमा पुर्याउने मेरो अठोट छ।”
“म भ्रष्टाचार गर्न राजनीतिमा आएको होइन, अनुभव र सामर्थ्य देशको सेवामा लगाउन आएको हुँ।”
सकारात्मक एजेन्डा, स्पष्ट दृष्टिकोण
उनको अभियान विपक्षी आलोचनाभन्दा योजना प्रस्तुतिमा केन्द्रित देखिन्छ। बाटो, बिजुली, शिक्षा र स्वास्थ्यका आधारभूत समस्याको दीर्घकालीन समाधानसहित पर्यटन–आधारित आर्थिक विकासलाई मुख्य प्राथमिकता दिइएको छ।
हजारौँ युवालाई स्वावलम्बी बनाउने विगतको अनुभव र संकटमा पनि लक्ष्य नछोड्ने नेतृत्व शैलीका कारण शेर्पा संखुवासभाली मतदातामाझ भरोसायोग्य विकल्पका रूपमा उभिएका छन्।
हिमालको शिखरमा ‘रोप फिक्सिङ’ गरेर बाटो बनाउने व्यक्ति अब संखुवासभाको विकासका लागि राजनीतिक मैदानमा उत्रिएका छन्। यदि मतदाताले उनलाई विश्वास गरे, त्यो केवल एक उम्मेदवारको जित मात्र होइन, उद्यमशीलता र दूरदर्शी नेतृत्वको नयाँ अध्याय सुरु हुने अपेक्षा गरिएको छ।
