ललितपुर । यातायात व्यवस्था कार्यालय एकान्तकुनामा सेवाग्राहीलाई अनावश्यक हैरानी दिने तथा अवैध रूपमा रकम असुल्ने बिचौलियाविरुद्ध प्रहरीले विशेष अपरेशन सञ्चालन गरेको छ। अपरेशनका क्रममा प्रहरीले १५ जनालाई पक्राउ गरेको छ।
प्रहरीका अनुसार लामो समयदेखि कार्यालय परिसरमा बिचौलियाहरू सक्रिय रहेको र सेवाग्राहीलाई विभिन्न बहानामा दुःख दिने, कागजी प्रक्रिया छिटो गराइदिने भन्दै पैसा असुल्ने गतिविधि भइरहेको सूचनाका आधारमा अपरेशन सञ्चालन गरिएको हो।
पक्राउ परेकामध्ये केहीले कार्यालय भित्रका कर्मचारीसँगको मिलेमतोमा काम गर्ने गरेको आशंका समेत गरिएको छ। उनीहरूलाई आवश्यक अनुसन्धानका लागि नियन्त्रणमा लिइएको प्रहरीले जनाएको छ।
सेवाग्राहीहरूले कार्यालयमा सिधै सेवा लिन कठिनाइ हुने, बिचौलियाको कारण थप खर्च र समय खर्चिनु पर्ने गुनासो गर्दै आएका थिए। पछिल्ला दिनमा यस्ता गुनासो बढेपछि प्रहरी सक्रिय भएको हो।
प्रहरीले पक्राउ परेकामाथि थप अनुसन्धान भइरहेको र संलग्न अन्य व्यक्तिहरूको पहिचान गर्ने काम पनि जारी रहेको जनाएको छ। यस घटनापछि कार्यालय परिसरमा कडाइ गरिएको छ भने सेवाग्राहीलाई सिधै सेवा लिन आग्रह गरिएको छ।
यस अपरेशनलाई बिचौलिया नियन्त्रणतर्फको महत्वपूर्ण कदमका रूपमा लिइएको छ।
