काठमाडौं । आगामी Non-Resident Nepali Association (एनआरएनए) आईसीसी निर्वाचन २०२६–२०२८ लाई लक्षित गर्दै युवा उपाध्यक्ष पदका उम्मेदवार Hanson Gauchan (ओमन गौचन) ले विश्वभर रहेका नेपाली युवालाई एउटै डिजिटल प्लेटफर्ममार्फत जोड्ने महत्वाकांक्षी योजना सार्वजनिक गरेका छन्। उनले प्रविधिको प्रयोगमार्फत विश्वव्यापी नेपाली समुदायलाई थप सक्रिय, संगठित र प्रभावकारी बनाउने प्रतिबद्धता व्यक्त गरेका हुन्।
गौचनका अनुसार हाल विश्वका ८० भन्दा बढी देशहरूमा लाखौँ नेपाली बसोबास गरिरहेका छन्। ती नेपाली युवालाई एउटै डिजिटल नेटवर्कमा जोडेर आपसी सहकार्य, अनुभव आदान–प्रदान र सशक्त सहभागिता सुनिश्चित गर्ने समय आएको उनले बताएका छन्। प्रस्तावित प्लेटफर्मले विश्वभरका नेपाली युवालाई एउटै डिजिटल छातामुनि ल्याएर नयाँ सम्भावना र सहकार्यको ढोका खोल्ने विश्वास उनको छ।
उनले विकास गर्न चाहेको डिजिटल प्लेटफर्ममार्फत नेपाली युवाले सजिलै एक–अर्कासँग जोडिन, भिडियो तथा विचार साझा गर्न, अन्तर्राष्ट्रिय नेटवर्किङ विस्तार गर्न र एनआरएनएका गतिविधिहरूमा प्रत्यक्ष रूपमा सहभागी हुन सक्ने व्यवस्था गरिने बताएका छन्। यसले विदेशमा रहेका नेपाली युवाबीच सहकार्यको नयाँ संस्कृतिको विकास गर्ने अपेक्षा गरिएको छ।
वेबसाइट मास्टर तथा Certified Internet Web Professional का रूपमा अनुभव बटुलेका गौचनले एनआरएन समुदायका लागि विशेष रूपमा डिजाइन गरिएको आधुनिक र प्रयोगकर्तामैत्री डिजिटल प्रणाली निर्माण गर्ने योजना रहेको बताएका छन्। उनले यो प्लेटफर्मलाई केवल सामाजिक सञ्जालको विकल्प मात्र नभई विश्वभरका नेपाली युवाको साझा डिजिटल समुदायको रूपमा विकास गर्ने लक्ष्य राखेका छन्।
गौचनका अनुसार विशेषगरी विदेशमा जन्मिएका दोस्रो र तेस्रो पुस्ताका नेपाली युवालाई आफ्नो जरा, पहिचान र नेपाली समुदायसँग जोड्ने महत्वपूर्ण माध्यमका रूपमा यो प्लेटफर्मले काम गर्नेछ। “आजको युग डिजिटल युग हो। यदि हामीले प्रविधिलाई सही रूपमा प्रयोग गर्न सक्यौँ भने विश्वका कुनाकाप्चामा रहेका नेपालीहरूलाई एउटै परिवारको रूपमा जोड्न सकिन्छ,” उनले भने।
उनले थपे, “मेरो दृष्टि भनेको विश्वभरका नेपालीलाई जोड्ने डिजिटल पुल निर्माण गर्नु हो। प्रविधिको माध्यमबाट हामी विश्वव्यापी नेपाली समुदायलाई अझ बलियो, सक्रिय र एकताबद्ध बनाउन सक्छौँ।”
गौचनले यो योजनालाई आफ्नो निर्वाचन एजेन्डाको मुख्य प्रतिबद्धतामध्ये एक भएको उल्लेख गर्दै आफू निर्वाचित भएमा आफ्नो कार्यकालभित्रै उक्त डिजिटल प्लेटफर्मलाई व्यवहारमा उतार्ने दृढ संकल्प व्यक्त गरेका छन्।
उनका अनुसार डिजिटल प्लेटफर्ममार्फत विश्वभर रहेका नेपाली युवाबीच उद्यमशीलता, नवप्रवर्तन, शिक्षा, रोजगारी र सामाजिक सहकार्यका नयाँ अवसरहरू सिर्जना हुनेछन्। यसले एनआरएनएलाई आधुनिक र प्रविधिमैत्री संस्थाका रूपमा अघि बढाउन पनि महत्वपूर्ण भूमिका खेल्ने विश्वास गरिएको छ।
एनआरएनएभित्र युवा पुस्तालाई केन्द्रमा राखेर ल्याइएको यस्तो प्रविधिमैत्री एजेन्डाले निर्वाचनको माहोललाई थप रोचक बनाइरहेको छ। विश्वव्यापी नेपाली समुदायलाई डिजिटल रूपमा जोड्ने अवधारणाले धेरै युवामा उत्साह थपेको बताइन्छ।
यसैबीच आगामी एनआरएनए आईसीसी निर्वाचनलाई लक्षित गर्दै विभिन्न पदका उम्मेदवारहरू आफ्नो एजेन्डा र योजनासहित अन्तर्राष्ट्रिय नेपाली समुदायबीच सक्रिय रूपमा अभियान सञ्चालन गरिरहेका छन्। यस्तो अवस्थामा डिजिटल कनेक्टिभिटीलाई प्राथमिकतामा राखेर अघि सारिएको गौचनको योजना चुनावी बहसको महत्वपूर्ण विषय बन्ने देखिएको छ।
