झापा — नेकपा (एमाले) का अध्यक्ष तथा पूर्वप्रधानमन्त्री केपी शर्मा ओली चुनावी अभियानमा सहभागी हुन झापा आइपुग्नुभएको छ। उहाँ आज झापा क्षेत्र नम्बर ५ तर्फ प्रस्थान गरी कार्यकर्ता भेला तथा चुनावी सभालाई सम्बोधन गर्ने कार्यक्रम रहेको एमाले स्रोतले जनाएको छ।
एमाले नेता डा. अबुल हुसैन अन्सारीले सामाजिक सञ्जालमार्फत अध्यक्ष ओली झापा आइपुगेको जानकारी दिँदै क्षेत्र नम्बर ५ मा चुनावी अभियान थप सशक्त बन्ने बताएका छन्।
उनका अनुसार अध्यक्ष ओलीको उपस्थितिले झापामा एमाले कार्यकर्तामा उत्साह र ऊर्जा थपिएको छ। “अध्यक्षज्यूको आगमनसँगै अभियानले नयाँ गति लिएको छ, क्षेत्र नम्बर ५ मा एमालेको जीत सुनिश्चित गर्ने संकल्पका साथ अघि बढिरहेका छौं,” अन्सारीले उल्लेख गरेका छन्।
अध्यक्ष ओलीले स्थानीय कार्यकर्तासँग छलफल गर्नुका साथै आमसभालाई सम्बोधन गर्दै विकास, समृद्धि र राजनीतिक स्थायित्वका विषयमा धारणा राख्ने कार्यक्रम रहेको बताइएको छ।
झापा एमालेका लागि परम्परागत रूपमा महत्वपूर्ण जिल्ला मानिन्छ। अध्यक्ष ओली स्वयम् झापाबाटै राष्ट्रिय राजनीतिमा उदाएका नेता भएकाले यहाँको चुनावी गतिविधिलाई विशेष चासोका साथ हेरिएको छ।
क्षेत्र नम्बर ५ मा प्रमुख दलहरूबीच प्रतिस्पर्धा तीव्र बन्दै गएको अवस्थामा अध्यक्ष ओलीको सक्रिय सहभागिताले चुनावी समीकरणमा नयाँ प्रभाव पार्ने आकलन गरिएको छ।
