विश्वभर रहनुभएका गैरआवासीय नेपाली दाजुभाइ तथा दिदीबहिनीहरूमा प्रवीण गुरुङ, गैरआवासीय नेपाली संघ (एनआरएनए) का उपमहासचिव तथा उपाध्यक्ष पदका प्रत्यासीले विशेष अपिल गरेका छन्। उनले आगामी मार्च १४–१६ मा काठमाडौँमा तय भएको १२औँ महाधिवेशनको पृष्ठभूमि र वर्तमान चुनौतीहरूको चर्चा गर्दै संकटमा परेका नेपालीहरूको सुरक्षा र संस्थाको पारदर्शिता सुनिश्चित गर्न जोड दिनुभयो।
प्रवीण गुरुङले विशेषगरी मध्यपूर्व क्षेत्रमा रहेका नेपाली श्रमिकहरूको अवस्था गम्भीर रहेको उल्लेख गर्दै, हालै गोरखाका युवा श्रमिक दिवस श्रेष्ठको निधनले सबैलाई मर्माहत बनाएको जनाउनुभयो। “हाम्रो पहिलो प्राथमिकता संकटमा परेका नेपालीहरूको सुरक्षा, सहजीकरण र मनोबल अभिवृद्धि हुनुपर्छ,” उहाँले आफ्नो अपिलमा उल्लेख गर्नुभयो।
उहाँले निर्वाचन समितिलाई विनम्र अनुरोध गर्दै भनिन—हालको असहज अन्तर्राष्ट्रिय परिस्थितिमा सम्पूर्ण निर्वाचन कार्यतालिका स्थगन गरियोस् र परिस्थिति सामान्य भएपछि सुरक्षित, सम्मानजनक र सर्वसम्मत महाधिवेशनको व्यवस्था गरियोस्।
साथै, सदस्यता प्रमाणीकरण, शुल्क नबुझेका एनसीसी र सदस्यहरूको स्पष्ट विवरण सार्वजनिक गर्ने, अवैधानिक नामहरू सूचीबाट हटाउने, तथा विधानमा उल्लेखित समयसीमा पूर्णरूपमा पालना गर्ने विषयमा पारदर्शिता सुनिश्चित गर्नुपर्नेमा उहाँले जोड दिनुभयो।
प्रवीण गुरुङले २०२१ को महाधिवेशनमा प्रतिनिधि विवादका कारण उत्पन्न समस्याबाट सिकाइ लिनुपर्ने र त्यस्तो गल्ती दोहोरिन नदिनुपर्ने उल्लेख गर्दै, व्यक्तिगत रूपमा विवादित प्रक्रियामा सहभागी नहुने प्रतिबद्धता व्यक्त गर्नुभयो। “मेरो लागि पदभन्दा संस्था ठूलो छ, र संस्थाभन्दा ठूलो यसको विश्वसनीयता र एकता हो,” उहाँले भन्नुभयो।
अन्ततः, गुरुङले सम्पूर्ण नेपाली समुदायमा धैर्य, संयमता र एकताको अपिल गर्दै भन्नुभयो—“हामी एकजुट भयौँ भने कुनै पनि चुनौती ठूलो हुँदैन।”
