द टन न्युज | विशेष रिपोर्ट
अत्तरियामा कांग्रेसको शुभकामना आदानप्रदान, संगठन सुदृढीकरणमा जोड
अत्तरिया, कैलाली। नेपाली कांग्रेस गोदावरी नगरकार्यसमितिले दशैँ, तिहार तथा छठ पर्वको अवसरमा कैलालीको अत्तरियामा शुभकामना आदानप्रदान कार्यक्रम आयोजना गरेको छ।
नगरसभापति रविन्द्र शाही (गुड्डु) को सभापतित्वमा आयोजित कार्यक्रममा महाधिवेशन प्रतिनिधि तथा पूर्वआमन्त्रित केन्द्रीय सदस्य आनन्द बिष्ट प्रमुख अतिथिका रूपमा सहभागी भएका थिए। कार्यक्रममा पार्टीका नेता, कार्यकर्ता तथा शुभेच्छुक गरी करिब १६० जनाको सहभागिता रहेको थियो।
पर्वको अवसरमा आपसी सद्भाव, एकता र भाइचारा अभिवृद्धि गर्ने उद्देश्यले आयोजित कार्यक्रममा नेपाली कांग्रेसको संगठनलाई थप सुदृढ र प्रभावकारी बनाउने विषयमा छलफल गरिएको थियो।
विशेषगरी गोदावरी नगरपालिकाभित्र तथा कैलाली निर्वाचन क्षेत्र नम्बर ४ मा पार्टी संगठनलाई बलियो बनाउने, नेता–कार्यकर्ताबीच समन्वय बढाउने र संगठनात्मक गतिविधिलाई थप सक्रिय बनाउने विषयले कार्यक्रममा प्राथमिकता पाएको थियो।
पर्वकेन्द्रित शुभकामना आदानप्रदानसँगै संगठन निर्माण र पार्टीको भावी रणनीतिबारे छलफल हुनु कार्यक्रमको महत्वपूर्ण पक्षका रूपमा रहेको छ। स्थानीय तहमा पार्टीको उपस्थिति प्रभावकारी बनाउँदै कार्यकर्ताबीच एकता र सहकार्य अभिवृद्धि गर्न यस्ता कार्यक्रमले सहयोग पुर्याउने अपेक्षा गरिएको छ।
नेपाली कांग्रेस गोदावरी नगरकार्यसमितिको आयोजनामा सम्पन्न कार्यक्रमले पर्वको खुसी साटासाट गर्नुका साथै स्थानीयस्तरमा संगठन सुदृढीकरणको विषयलाई समेत केन्द्रमा राखेको छ।
द टन न्युज
