सर्लाही — राष्ट्रिय स्वतन्त्र पार्टी (रास्वपा) का नेता डा. अमरेश कुमार सिंहले आफू रेकर्ड मतका साथ विजयी हुने दाबी गरेका छन्। सर्लाही निर्वाचन क्षेत्र नं. ४ मा फागुन २१ नजिकिँदै जाँदा चुनावी गतिविधि तीव्र बनेका छन् भने विभिन्न दलका उम्मेदवारहरू घरदैलो, जनभेटघाट र कोणसभामा व्यस्त देखिएका छन्।
डाक्टर सिंहले चुनावी सभामा बोल्दै मधेश क्षेत्रमा आफ्नो पार्टीको समर्थन बढ्दो रहेको दाबी गर्दै “मधेश घण्टीमय भइसकेको छ, यो आन्धी अब कसैले रोक्न सक्दैन” भन्ने अभिव्यक्ति दिएका छन्। उनका समर्थकहरूका अनुसार युवापुस्ता, किसान तथा उद्यमी वर्गबाट उल्लेख्य समर्थन प्राप्त भइरहेको छ।
स्थानीय बजार, गाउँबस्ती र टोल–टोलमा अहिले चुनावी बहस, छलफल र भेटघाटले माहोल तातेको छ। मतदाताहरू विकास, रोजगारी, कृषि सुधार, शिक्षा र स्वास्थ्य सेवा विस्तारजस्ता मुद्दालाई केन्द्रमा राखेर उम्मेदवारहरूसँग प्रत्यक्ष संवाद गरिरहेका छन्।
यसैबीच अन्य दलका उम्मेदवारहरूले पनि आफ्नो पक्षमा माहोल बलियो रहेको दाबी गर्दै चुनावी प्रतिस्पर्धा झन् रोचक बनेको बताएका छन्। फागुन २१ नजिकिँदै जाँदा सर्लाही–४ मा चुनावी रौनकता थप बढ्दै गएको स्थानीय विश्लेषकहरूको भनाइ छ।
