काठमाडौं — नेपाली कांग्रेसका युवा नेता लोकनाथ अधिकारीले सार्वजनिक सरोकार र पारदर्शितासम्बन्धी विषय उठाउँदै सामाजिक सञ्जालमार्फत कडा प्रश्नहरू सार्वजनिक गरेका छन्। उनले सरोकारवालाहरूलाई लक्षित गर्दै पैत्रिक सम्पत्ति, बिरासतबाट आएको अंश, इमानपूर्वक आर्जन गरिएको सम्पत्ति तथा राज्यलाई तिरेको करबारे स्पष्ट जवाफ दिन आग्रह गरेका हुन्।
अधिकारीले आफ्नो स्टाटसमा “तपाईंको पैत्रिक सम्पत्ति कति हो? बिरासतबाट आएको अंश कति हो? इमानपूर्वक आर्जन गरेको सम्पत्ति कति हो? राज्यलाई कति कर तिर्नुभयो? तिरेको करको प्रमाण छ कि छैन?” जस्ता प्रश्न उठाएका छन्। साथै, दैनिक खर्च र आम्दानीबीचको तालमेल मिल्छ कि मिल्दैन भन्ने विषयमा समेत स्पष्टता आवश्यक रहेको उनको भनाइ छ।
उनले समाजमा “म र मेरा वरपरका सबै इमानदार, अरू सबै बेईमान” भन्ने भाष्य कति समयसम्म चलिरहने भन्ने प्रश्नसमेत उठाएका छन्। भ्रम र गलत धारणा अन्ततः टुट्ने भए पनि त्यसबेलासम्म राष्ट्रले ठूलो क्षति व्यहोर्नुपर्ने अवस्था आउन सक्ने भन्दै उनले सचेत गराएका छन्।
लोकनाथ अधिकारीको उक्त अभिव्यक्तिले सार्वजनिक जीवनमा रहेका व्यक्तिहरूको पारदर्शिता, कर प्रणाली र नैतिक उत्तरदायित्वबारे पुनः बहस सुरु गराएको छ। विश्लेषकहरूका अनुसार यस्ता प्रश्नहरूले सुशासन र जवाफदेहिताको संस्कार मजबुत बनाउन सकारात्मक दबाब सिर्जना गर्न सक्छन्।
