🚨 BREAKING NEWS🚨 निर्वाचन आयोगले गगनकुमार थापालाई नेपाली कांग्रेसको आधिकारिक सभापतिको मान्यता दियो

🚨BREAKING NEWS 🚨

निर्वाचन आयोगले गगनकुमार थापालाई नेपाली कांग्रेसको आधिकारिक सभापतिको मान्यता दियो

काठमाडौं — निर्वाचन आयोगले गगनकुमार थापालाई नेपाली कांग्रेसको आधिकारिक सभापतिको मान्यता दिएको छ। राजनीतिक दलसम्बन्धी ऐनको दफा ५१ अनुसार विवरण अद्यावधिक गर्दै आयोगले थापा नेतृत्वको पक्षलाई आधिकारिक मान्यता दिने निर्णय गरेको हो।

कार्यवाहक प्रमुख निर्वाचन आयुक्त रामप्रसाद भण्डारी र आयुक्त जानकी तुलाधारले थापा पक्षको पक्षमा निर्णय दिएका छन्। आयुक्त सगुनशमशेर राणाले भने फरक मत राखेका छन्, आयोग उच्च स्रोतले जनाएको छ।

पुस २७ देखि ३० सम्म काठमाडौंमा सम्पन्न विशेष महाधिवेशनबाट गगन थापा नेपाली कांग्रेसको सभापतिमा निर्वाचित भएका थिए। विशेष महाधिवेशनको निर्णयअनुसार सभापति थापासहित नवनिर्वाचित पदाधिकारीहरूले बिहीबार आयोगमा विवरण अद्यावधिकका लागि निवेदन दिएका थिए।

यसअघि पूर्णबहादुर खड्का पक्षका नेताहरूले शुक्रबार बिहान आयोगमा आफूहरू आधिकारिक भएको दाबी गर्दै निवेदन दिएका थिए। दुवै पक्षको दाबीपछि आयोगले नवनिर्वाचित पदाधिकारीहरूलाई बोलाएर छलफल गरेको थियो।

सबै प्रक्रिया र कागजात अध्ययनपछि आयोगले गगन थापा नेतृत्वको पक्षलाई आधिकारिक नेपाली कांग्रेसको मान्यता दिएको हो।

मान्यता पाएसँगै नेपाली कांग्रेसको चुनाव चिह्न ‘रुख’ र चारतारे झण्डा अब गगन थापा पक्षकै हुने भएको छ।

यस निर्णयसँगै नेपाली कांग्रेसभित्र लामो समयदेखिको नेतृत्व विवाद औपचारिक रूपमा टुंगिएको राजनीतिक वृत्तको विश्लेषण छ।

को हुन् गगन थापा ?

नेपाली राजनीतिका परिवर्तनकामी नेता

गगनकुमार थापा नेपाली राजनीतिमा सिद्धान्त, साहस र स्पष्ट अभिव्यक्तिका लागि परिचित नेता हुन्। विद्यार्थी राजनीतिबाट उदाएका थापा आज नेपाली कांग्रेसको सभापति बन्न सफल भएका छन्।

विद्यार्थी राजनीतिबाट राष्ट्रिय नेतृत्वसम्म

त्रिभुवन विश्वविद्यालयमा अध्ययनरत रहँदा नेपाल विद्यार्थी संघ (नेविसंघ) बाट सक्रिय राजनीति सुरु गरेका थापा राजा ज्ञानेन्द्रको प्रत्यक्ष शासनविरुद्धको आन्दोलनमा अग्रपंक्तिमा देखिएका थिए। पटक–पटक जेल परे पनि उनी पछि हटेनन्।

संसदमा स्पष्ट आवाज

थापा पटक–पटक प्रतिनिधिसभा सदस्य निर्वाचित भइसकेका नेता हुन्। संसदमा भ्रष्टाचारविरोधी, सुशासन, शिक्षा, स्वास्थ्य र युवाका मुद्दामा निर्भीक रूपमा बोल्ने नेताको छवि उनले बनाएका छन्।

मन्त्रीको भूमिकामा सुधारका प्रयास

स्वास्थ्य तथा जनसंख्या मन्त्री रहँदा निःशुल्क औषधि, स्वास्थ्य संस्थामा सुधार र सेवामा पहुँच विस्तार का विषयमा उनले थालेका पहल चर्चित छन्।

पार्टीभित्र पुस्तान्तरणको प्रतीक

नेपाली कांग्रेसभित्र पुरानो गुटगत राजनीतिलाई चुनौती दिँदै पुस्तान्तरण र आन्तरिक लोकतन्त्रको वकालत गर्ने नेता हुन् गगन थापा। विशेष महाधिवेशनमार्फत सभापतिमा निर्वाचित हुनु पार्टीभित्र परिवर्तनको जनादेश मानिएको छ।

आगामी बाटो

अब आधिकारिक सभापतिको मान्यता पाएसँगै नेपाली कांग्रेसलाई एकताबद्ध गर्दै आगामी निर्वाचनमा प्रतिस्पर्धी बनाउने चुनौती थापासामु छ। समर्थकहरू भने उनलाई आधुनिक, पारदर्शी र परिणाममुखी कांग्रेसको नेतृत्वकर्ता का रूपमा हेरेका छन्।